قادین حوقوقلاری ساوونوجوسو آزیتا اسکندریون زنجان اینقیلاب محکمه‌‌سینده محکوم ائدیلیب

قادین حوقوقلاری ساوونوجوسو آزیتا اسکندریون “ایران ایسلام جمهوریتینه قارشی تبلیغات آپارماق” اتهامی ایله زنجان اینقیلاب محکمه‌‌سی‌نین ۲-جی شؤبه‌سی طرفیندن ۹۱ گونلوک ۷-جی درجه‌‌‌لی حبس جزاسی یئرینه ۴ میلیون تومن جریمه‌یه محکوم ائدیلیب.

زنجان اینقیلاب محکمه‌‌سی‌نین ۲-جی شؤبه‌سی‌نین چیخاردیغی قرارین بیر حیصّه‌‌‌سینده دئییلیر: “محکمه‌‌ جینایت تؤرتمه‌سینی بللی و قطعی حساب ائدیر و سندلره اساساً ایسلام جینایت قانونونون ۵۰۰-جو ماده‌‌سینه اویغون اولاراق چکیندیریجی جزا چیخاریر و اعلان ائدیلیر. لاکین تقصیرلندیریلنین گنج اولدوغونو نظره آلاراق و پئشمانلیق دویدوغونا گؤره و جینایت کئچمیشی اولمادیغینا گؤره ۹۱ گونلوک ۷-جی درجه‌‌‌لی حبس جزاسی یئرینه ۴ میلیون تومن جریمه‌یه محکوم ائدیلیب.

بوندان اؤنجه خانیم اسکندریون زنجان عومومی و اینقیلاب ساوجیلیغنا چاغیریلدیقدان سونرا اتهامی باره‌ده بیلگی آلیب و مووقتی اولاراق محکمه‌یه قدر گیروو قارشیلیغیندا سربست بوراخیلیب.