یورولماز، قورخماز و اینسان قالان بیر اینسانین اورگی دایاندی !
بو گون آذربایجان اؤزونون ان صاف و ان آلچاقگؤنوللو اوغوللاریندان بیرینی ایتیردی. صالح ملاعباسی آذربایجان میللی حرکتینین تانینمیش مدنی و سیاسی فعالی، اورک دایانماسی نتیجهسینده آرامیزدان کؤچدو. او حیاتینی درد چکنلرین یانیندا اولماغا و اؤز ائلینین آماج ایدهآللارینا چالیشیب وفالی قالماغا صرف ائتمیشدی.
صالحین گئتمهسی بیر انسانین اؤلومو دئییل؛ او، بیزیم جمعی حافظهمیزده دیرنیش، اومود و چابا گؤسترمکلریمیزین بیر دیرهکایدی.
صالح ملاعباسی ۱۳۷۰-جی ایللرین باشلاریندا تبریز بیلیمیوردوندا اوخودوغو دؤنمده میللی اویانیشا قوشولدو. ۱۳۷۴-جو ایل سئچکیلری، دوکتور چهرگانینین نامیزدلیگی و تبریز بیلیمیوردوندا یارانان اعتراضی فضا اونون سیاسی شخصیتینی شکللندیرن بؤیوک تاثیرلر اولدو. او گوندن اعتیبارا معاملهسیز، دؤنمز و پرینسیپلی بیر فعال کیمی تانیندی.
مییلتیمیزین سیاسی حوقوقلارینا، توپلوموموزون فردی و جمعی دردلرینه، جوغرافیا و طبیعی سرمایهلریمیزه و آذربایجانین بوتون مادی-معنوی میراثینا درین سئوگی و چابا بسلهدی. بابک قالاسیندا سیاسی ییغینجاقلاردان توتاق تبریز زیندانینا قدر و ... آذربایجان تورک میللتینین دایانیش و دیرهنیش حافظهسینه کئچن بیر انسان اولوبدور.
بو انسانلیغین بدلینی دفعهلرله اؤدهدی. احضار اولوندو، تهدید ائدیلدی، توتوقلاندی و زندانا سالیندی. ۱۳۸۵، ۱۳۸۶، ۱۳۸۸-جی ایللرده پروندهلرایله اوز-اوزه قالدی و دفعهلرله توتوقلانیب و حبس ائدیلدی. ۱۳۹۲-جی ایلین اسفند آییندا اهرده آنا دیلی گونو مراسمینده، ۱۳۹۴-ده ایسه مدنی فعالیتلری سببیله، و ان سون ۱۴۰۱-جی ایلده “قادین، یاشام، آزادلیق” اعتراضلاری دؤنمینده یئنه توتوقلاندی و اوزون سورن بلاتکلیفییه اعتیراض اوچون آجلیق اعتصابیدا ائتدی.
صالحی بؤیوک ائدن فقط زندان و محکومیتلر دئییلدی. او تکجه اؤز آزادلیغی اوچون یوخ، باشقالارین آزادلیغی اوچونده دؤیوشوردو. بابک قالاسی مراسمینده توتوقلانانلارین عاییلهلری، تبریز و اردبیل سیاسی محکوملارینین آنالاری و زندان قاپیسی آغزیندا گؤزلهینلر اونو یاخچی تانییردیلار. او اونلارین یانیندا اولار، اومود وئرر، یاردیم ائدر و دایاق دوروردو.
سون گؤروشوموز هله ده گؤزومون قاباغیندادیر: گولر اوزو، ساکیت اما درین باخیشلاری، قایغی دولو اورهیی و دوشونجهدن قاینایان سؤزلری... او دانیشدیقجا سؤزلری بیرباشا قلبه دییردی. اونون سؤزلرینده هم درد وار ایدی، هم اومود؛ هم نیگرانلیقلار، هم ده صاباحا اینانج. سن دئمه، او گؤروش بیر وداعین ساکیت اؤنویموش.
صالح هر زامان حق و حقیقته طرفکشلیگیایله، آرمانلارینا و آذربایجان میللتی چیخارلارینا صادیق قالدیغی اوچون تاریخیمیزده چوخ دیرلی یئر آلیبدیر. او چوخلارین نزدینده اخلاقی بیر دایاق، یورولماز، قورخماز و هر شرایطده انسان قالان بیر آدامیدی.
بو گون صالحین اورهیی دایاندی، اما اونون تمثیل ائتدیگی دیَرلر،اینسان کرامتی، اؤز مقدراتینی تعیین ائتمک حقی، آنا دیلی ایستهیی و مدنی موقاویمت دایانماز.
آدلار گئدر، یوللار قالار. صالح ملاعباسی آرتیق فقط بیر آد دئییل؛ او، آذربایجانین مبارزه حافظهسینین بیر پارچاسیدیر. یادی آدی اؤنونده اییلیریک. آدی یاشاسین، یولو داوام ائتسین.
سنه داریخاجاییق عزیز اینسان
خوش گئتدین قارداش
آراز سلیمانی - اردبیل
تیر آیین نین ایکی سی - ۱۴۰۴
