اوین حبس‌خاناسیندا ساخلانیلان تورک وکیل و مدنی فعال طاهر نقوی، حبس‌خانا موحافیظه‌‌‌چیلری‌نین عائله‌‌‌سینه قارشی قئیری-اینسانی و زوراکی داورانیشینا اعتراض اولاراق موعالیجهدن ایمتینا ائدیب.
تورک وکیل سینا یوسفی ایکس حسابیندا یازیب: "۲۲ اسفند ۱۴۰۳-ده حبس‌خانا حکیمی‌نین موعالیجه‌‌‌نین تعجیلی و واجیب اولدوغو باره‌ده ۹ آی اؤنجه وئردیگی گؤستریشه باخمایاراق، طاهر نقوی نهایت خسته‌خانایا کؤچورولموشدو. عائله‌‌‌سی ایسه طبی تئستلرین خرجلرینی اؤده‌مک اوچون خسته‌خانایا دعوت اولونموشدو. لاکین اوین حبس‌خاناسی‌نین موحافیظه خیدمتی‌نین زوراکی و تهدید‌ائدیجی داورانیشی بو وکیلین موعالیجه‌‌‌یه داوام ائتمه‌سیندن ایمتینا ائتمه‌سینه سبب اولدو."
قئید ائدک کی، طاهر نقوی ۹ آیدیر کی، تعجیلی موعالیجه‌‌‌یه و خسته‌خانادا یاتماغا احتیاج دویور، لاکین حبس‌خانا یئتکیلیلری و گوونلیک قوه‌لری موختلیف بهانه‌لرله اونون موعالیجه حوقوقونو الیندن آلیبلار.
طاهر نقوی ۱۴۰۲-جی ایل بهمن آییندا کرج‌ده گوونلیک گوجلری طرفیندن حبس ائدیلدی. او حبس اولوندوقدان سونرا اوین محکمه‌‌سینده، "رئژیمه قارشی تبلیغات" و "میلی گوونلیگی پوزماق مقصدی ایله توپلاشماق و ال بیر اولماق" ماده‌‌لری ایله اتهام ائدیلیب و محکمه‌‌سی تهران اینقیلاب محکمه‌‌سی‌نین ۱۵-جی شؤبه‌سینده حاکم ابوالقاسم صلواتی‌نین باشقانلیغی ایله کئچیریلیب.
طاهر نقوی “قادین، حیات، آزادلیق” اعتراضلاریندا حیاتینی ایتیرن بعضی وطنداشلارین عائله‌‌‌لرینی تمثیل ائدیب.
