ایران اینسان حاقلاری تشکیلاتلاری‌نین راپورونا گؤره، نارکوتیک و یا قصداً آدام اؤلدورمه اتهامی ایله اعدام و یا قیصاصا محکوم ائدیلن بیری قادین اولماقلا ۴ محبوسون حؤکملری کرج‌ده ایجرا ائدیلیب.
ایران اینسان حاقلاری تشکیلاتی ۷ اردیبهشت ۱۴۰۳-ده یایدیغی راپوردا بو دؤرد نفردن بیری‌نین کیملیگینی آچیقلاییب و یازیب کی، پژمان عزیزی‌نین اعدام حؤکمو چارشنبه گونو ۵ اردیبهشتده نارکوتیکله باغلی اتهاملا کرجده‌کی قزل حصار حبس‌خاناسیندا ایجرا اولونوب. بو تشکیلات بیلگیلی قایناقلارا ایستینادا آرتیریب کی، پژمان عزیزی حبس اولونارکن چوخ گنج ایدی و اونون اوشاق محکوم اولماسی احتیمالی وار.
بو خبره گؤره، کرج‌ده قصداً آدام اؤلدورمه اتهامی ایله قیصاص محکوم ائدیلمیش ایکی ارکک و بیر قادینین اعدام حؤکمو چارشنبه گونو سحر ساعتلاریندا ایجرا ائدیلیب.
جوما آخشامی، ۶ اردیبهشتده کنا سایتی یایدیغی بیر راپوردا قتل اتهامی ایله ایکی ارکک و بیر قادینین اعدام ائدیلمه‌سی خبرینی تصدیقله‌ییب.
بوندان اؤنجه ۱۶ فروردین گونو اولوسلارآراسی عفو تشکیلاتی “بیزی اؤلدورمه‌لرینه ایجازه وئرمه‌یین” آدلی آراشدیرما راپوروندا ۲۰۲۳-جو ایلده ایراندا ۸۵۳ نفرین اعدام ائدیلدیگینی اعلان ائتمیش و بونو سون ۸ ایلده گؤرونمه‌میش حساب ائتمیشدی. بو راپورا گؤره، ۴۸۱ اعدام، یعنی قئیده آلینان توپلام اعداملارین یاریدان چوخو نارکوتیک جینایتلری ایله باغلی اتهاملارلا حیاتا کئچیریلیب. بو رقم ۲۰۲۲-جی ایلله موقایسه‌‌ده یوزده ۸۹ آرتیب، بو مدت ایچینده نارکوتیکلرله باغلی جینایتلر تؤرتدیکلرینه گؤره ۲۵۵ نفر اعدام ائدیلیب.
