اولوسلارآراسی آنا دیلی گونونده تورکجه کیتابلاری پایلادیغی اوچون حبس ائدیلن اوجان (بوستان‌آباد) شهرینده یاشایان تورک مدنی فعال مجتبی عبدلی‌نین حبسی‌نین اوزریندن بیر هفته‌دن چوخ واخت کئچمه‌سینه باخمایاراق، او، هله ده حبسده ساخلانیلیر و اونون دورومو باره‌ده هئچ بیر بیلگی یوخدور.
عائله‌‌‌سینه یاخین بیر قایناق بو بیلگینی تصدیقله‌یه‌رک دئییب: “مجتبی عبدلی اولوسلارآراسی آنا دیلی گونونو قئید ائتمک مقصدیله تورک دیلینده کیتابلار پایلادیغی اوچون ۴ اسفند گونو اوجان شهرینده اینقیلاب کئشیکچیلری اطلاعاتی طرفیندن حبس اولونوب. لاکین اونون هارادا ساخلانیلدیغی باره‌ده هئچ بیر بیلگی یوخدور و بو مسئله عائله‌‌‌سی و یاخینلاری آراسیندا جدی ناراحاتلیغا سبب اولوب.”
بو تورک فعالین عائله‌‌‌سی حبسیندن سونرا محکمه و گوونلیک اورقانلارینا موراجعت ائتسه ده، ایندییه قدر اونون ساخلانیلدیغی یئر و دورومو ایله باغلی آیدین بیر جاواب آلا بیلمه‌ییبلر.
بو تورک مدنی فعالین عائله‌‌‌سی حبسیندن سونرا محکمه و گوونلیک اورقانلارینا موراجعت ائدیب، لاکین اونون ساخلانیلدیغی یئر و دورومو باره‌ده هئچ بیر آیدین جاواب آلا بیلمه‌ییبلر.
اؤتن هفته دونیادا اولوسلارآراسی آنا دیلی گونو قئید اولونسا دا، ایراندا بونون عکسینه اولاراق فعاللارین حبس اولونماسی ایله یاددا قالدی. یالنیز بیر نومونه اولاراق، ۴ اسفند ۱۴۰۳-جو ایلده ماراغادا مدنی فعال محمد اسدی اوخوللاردا تورک دیلینده ناغیل کیتابلاری پایلادیغی اوچون ایرانین اطلاعات ناظرلیگی طرفیندن حبس ائدیلدی.
قئید ائدک کی، ایران ایسلام جمهوریتی آنایاساسی‌نین ۱۵-جی ماده‌‌سینه اساساً، رسمی دیل فارس دیلی اولسا دا، باشقا ائتنیک قروپلارین و ملتلرین ادبياتی‌نین اوخوللاردا ائیتیمی سربست اولمالیدیر. لاکین بونا باخمایاراق، بو قانون ایجرا ائدیلمیر و آنا دیلینده ائیتیمه قارشی موختلیف مانعه‌لر یارادیلیر.
Iranwire
