زاهیدان ساوجیسی بازار گونو ۱۲ اسفندده ۵ یاشلی بلوچ اوشاق یوسف شهلی‌برین اؤلومونه سبب اولان پرونده اوزره ۹ پولیس امکداشی‌نین حبس ائدیلدیگینی آچیقلاییب.
ایرانشهرلی ۵ یاشلی یوسف شهلی‌بر ۷ اسفندده سلاحلی قوه‌لرین اونون اولدوغو اتومبیله آچدیغی آتش سونوجوندا اؤلدورولوب. حادثه زامانی اتومبیلده اولان آناسی مریم شهلی‌بر حامیله اولوب و او، بو هوجوم سونوجوندا کؤرپه‌سینی ایتیریب.
ایسنا خبر آژانسی یازیب کی، زاهیدان ساوجیسی حادثه‌‌‌دن ضررچکن عائله‌‌‌یه و ایالت ساکینلرینه گوناهکارلارین جزالاندیریلاجاغینا دایر سؤز وئریب.
سیستان و بلوچیستان پولیس ایداره‌سی‌نین خالق ایله ایلیشگیلر اوزره معاونی سرهنگ رحیمی ایسه یوسف شهلی‌برین عائله‌‌‌سی ایله گؤروشونده حوقوق-موحافیظه و محکمه اورقانلاری‌نین اوشاغین اؤلومو ایله باغلی مسئله‌نی آراشدیردیغینی ادعا ائدیب.
بو ۵ یاشلی اوشاغین حؤکومت قوه‌لری طرفیندن نیظامسیز آتش آچیلماسی سونوجوندا اؤلدورولمه‌سی سون گونلرده سیستان و بلوچیستان ایالتینده گئنیش اجتماعی اعتراضلارا سبب اولوب. سوسیال شبکه‌لرده ده بو اوشاغین جسدی‌نین گؤرونتولری گئنیش شکیلده یاییلیب.
جوما گونو، ۱۰ اسفندده زاهیدان شهری‌نین سونی جوما ایمامی مولوی عبدالحمید اسماعیل زهی جوما خوطبه‌‌‌سینده حؤکومت قوه‌لری‌نین مسوولیت‌سیز آتش آچماسینی تنقید ائدیب و محکمه اورقانلاری‌نین تئز بیر زاماندا مسئله‌‌یه باخماسینی و گوناهکارلاری جزالاندیرماسینی طلب ائدیب.
او، آیریجا حؤکومتین حربی و گوونلیک قوه‌لری‌نین قانونا رعایت ائتمه‌لی اولدوغونو وورغولایاراق دئییب: "اگر بیر جینایتکار قاچسا، بو، گوناهسیز اینسانلارین اؤلدورولمه‌سیندن داها یاخشیدیر."
