موختلیف ساحه‌‌‌لردن اولان ۸۵ نوبل اؤدولو قازانانی آچیقلاما یایاراق نرگس محمدی‌نین و باشقا سیاسی محبوسلارین قئید-شرطسیز آزاد ائدیلمه‌سینی ایسته‌ییب.
بو آچیقلانانین بیر نوسخه‌سی ۲۳ اسفند ۱۴۰۳-جو ایلده ایران‌وایرین الینه چاتیب. ایمضالایانلار بیلدیریبلر کی، نرگس محمدی “ایران‌دا قادینلارا قارشی تضییقلره قارشی موباریزه‌سی و اینسان حاقلاری ایله آزادلیغی تشویق ائتمه‌سی” سببیله تقدیرلاییق ساییلیب و حبسده اولارکن نوبل اؤدولو آلان بئشینجی شخص اولوب.
اونلار قئید ائدیبلر کی، نرگس محمدی ۱۴۰۳-جو ایلین آذر آییندان اعتباراً اوین حبس‌خاناسیندان مووقتی اولاراق آزاد ائدیلسه ده، بو آزادلیق “ثابت دئییل و لغو ائدیله بیلر”.
نوبل اؤدولو قازانانلاری دئییبلرکی، اونون مووقتی آزادلیغی قئید-شرطسیز و دایمی اولسون.
آچیقلامادا قئید ائدیلیب: “نرگس محمدی اون مینلرله اینسان حاقلاری ساوونوجوسو، سیاسی موخالیفتچی، صنعتچی، ژورنالیست و ایران رژیمینی آچیق شکیلده تنقید ائدنلر کیمی سیاسی اتهاملارلا حبس اولونوب. او، ۱۳۹۵-جی ایلده حبس ائدیلیب و آلتی محکمه سورجی سونوجوندا جزاسینا ۱۳ ایلدن چوخ مدت علاوه اولونوب. حبسده اولماسینا باخمایاراق، رژیمه قارشی اعتراض سسینی بوغمادی و قادین حاقلاری ایله اینسان حاقلارینی ساوونمایا داوام ائتدی. اونون عدالت اوغروندا یورولماز موباریزه‌سی، ایستیبدادا قارشی مقاومت روحونون سمبولودور.”
آچیقلامادا علاوه ائدیلیب کی، نرگس محمدی‌نین موباریزه‌سی تکجه اونا عاید دئییل، “بو، هر بیر قادینین، هر بیر سیاسی محبوسون و ظولمه قارشی دورماغا جسارت ائدن هر بیر اینسانین موباریزه‌سیدیر.”
نوبل اؤدولو قازانانلاری “بیز نرگس محمدی‌نین یانینداییق؛ عدالتلی و برابرحوقوقلو بیر ایران آرزوسو اوغروندا حاقسیز یئره حبس ائدیلن هر کسین یانینداییق” ایفاده‌لرینی وورغولاییبلار.
اونلار نرگس محمدی‌نین قئید-شرطسیز آزاد ائدیلمه‌سی و بوتون اتهاملارین لغوینی طلب ائتمکله یاناشی، اولوسلارآراسی توپلومدان ایران خالقی‌نین آزادلیق ایسته‌یی ایله کئچیردیگی اعتراضلاری دستکله‌مه‌یه و “قادین، حیات، آزادلیق” شوعارینی دونیایا یایماغا چاغیریبلار.
