“قادین اثرلری کتاب‌ائوی” راپورو حاضیرلایان افسون سلطانی قادینلاری غیرتی و ائل‌بیلیمی موسسه‌سینین ایش‌بیرلیگی‌یله “قادین اثرلری” کتاب‌ائوی‌نین تانیتیم مراسیمی بیر گؤزل شعر ایفاسی‌یله باشلاندی: شاعرلر، یازیچی‌لار، دانشگاه استادلاری و گله‌جگین یول گؤسترنلری بو تانیتیم مجلیسینده بیر آرایا گلمیشدیلر. باشقا شهرلردن ده قوناقلار واریدی، او‌جمله‌دن ارومیه، اردبیل، مرند و مراغه و میانا شهرلریندن. ایلک اؤنجه مهندس صرافی تریبون آرخاسینا کئچیب قوناقلاری سلاملادیقدان سونرا بو ییغینجاقین ندنینی قادین اثرلری کتابخاناسینین تانیتیمی بیلدیررک، اونون یانی‌سیرا دا دونیادان یئنی کوچموش اردبیل‌لی ژورنالیست و یازار مژگان خانیم صیامی‌نین خاطره‌سینی عزیزله‌دی. آرتیرمالییام کی بو دگرلی یازار خانیمین عایله‌سیندن ده مجلیس‌ده اشتراک ائتمیشدیلر.
بو دردلی عایله‌یه باش ساغلیقی دیله‌دیکدن سونرا مهندس صرافی برنامه‌نین گئدیشاتینی قیساجا اعلام ائدیب ایلک بؤلومون هیئت مدیره‌سی یعنی خانم فرانک فرید و خانم ذکیه ذوالفقارینی یئرلرینه دعوت ائتدی . ایلک بؤلومده دانیشانلار شهریمیزین بؤیوک یازاری خانم رقیه کبیری، سوسیولوگ حسن بگ مرادی و گنج یازار اولدوز خانیم صادق اولدولار .
سونرا خانم ذوالفقاری بیر اورک یازیسینی اوخودو، نهایت جناب مهندس صرافی کتابخانانین قورولوشو حاقیندا مبسوط ایضاحلار وئردیلر. مختصر آنتراکت‌دان سونرا ایکینجی بؤلومون هیئت مدیره‌سی جناب مهندس صرافی و اولدوز صادق یئرلرینی آلدیلار . بو بؤلومده ایلک اؤنجه مرجان خانیم مناف‌زاده تریبون آرخاسینا کئچیب تازا دونیاسینی دییشمیش ژورنالیست و یازار خانم مژگان صیامی‌نین مختصر بیوگرافی‌سینی بیان ائتدیکدن سونرا ادبیاتیمیزین بو پارلاق اولدوزونا رحمت و عایله‌سینه دوزوم دیله‌دی.
اورمیه‌لی شاعر و یازار خانم زیبا منوچهری بو بؤلومون ایکینجی دانیشانی اولاراق صحنه‌یه دعوت اولوندو. او اؤز سؤزلرینده دونیا قادین یازارلاریندان و اونلارین حیاتلارینداکی چتینلیکلردن دانیشدی. نهایتده سؤز بو کیتابخانانین قوروجولاریندان اولان خانم فرانک فریده وئریلدی. خانم فرید اؤزو دئمیشکن یوز قیرخ جیلد کتابینی یعنی اورگینی بو کتابخانایا اهدا ائتمیشدی، اورک سؤزلرینی بیان ائتدیکدن سونرا بیر پارا ایضاحلار وئریب جناب مهندس صرافی، خانم مناف‌زاده، خانم رقیه کبیری، خانم ذکیه ذولفقاری، خانم سمیه پورعلی و باشقالاریندان اهدا ائتدیکلری کیتابلار و چکدیکلری زحمتلر اوچون تشکر ائتدی. مراسیمین سونونجو بؤلومو هنری ایفالارا اختصاص وئرلمیشدی، بو بؤلومده ایلک اؤنجه تبریزین استعدادلی آپاریجی و دیکلمه‌چیسی سمیرا خانیم تقی‌زاده گؤزل بیر شعر دیکلمه ائدیب آردیندان بیر بداهه اجرا ائتدی. سونرا کیچیک یاشلی هنرمند فاطمه بدیع صحنه‌یه چیخیب “سلیمان‌شاه ایله قاریشقا” آدلی گؤزل بیر آذربایجان فولکلوریک ناغیلینی دانیشدی.
نهایتده سون سؤز موسیقی‌یه وئریلیب، گنج صنعتکارلار سئویل اقدسی و نازلی مصطفائی‌نین گؤزل تار و کمانچا ایفالاری ایله مجلیسه سون وئریلدی. همین مراسیمده قوناقلار طرفیندن ۸۰ جلده یاخین قادین اثرلری اولان کتاب، یئنی قورولان کتابخانایا اهدا اولوندو.
