ایراندا گئنیش‌میقیاسلی تعطیل دالغاسی داوام ائدیر. اؤلکه‌نین ۲۵ ایالتینده اوخوللار و ایداره‌لر ۷ اسفند ۱۴۰۳-ده چارشنبه آخشامی گونو ده، آردیجیل ایکینجی گون اولماقلا، باغلی قالاجاق.
ایلنا خبر آژانسی‌نین وئردیگی بیلگیلره گؤره، تهران، اصفهان، لوریستان، کیرمان، کوردوستان، قوم، دوغو آذربایجان، باتی آذربایجان، کیرمانشاه، البورز، فارس، رضوی خوراسان، قوزئی خوراسان، گونئی خوراسان، گولوستان، گیلان، اردبیل، سیمنان، قزوین، زنجان، همدان، مرکزی، ایلام، چاهارماهال و بختیاری و مازانداران ایالتلری چارشنبه آخشامی، بازار ائرته‌سی اولدوغو کیمی باغلی اولاجاق.
سیستان و بلوچیستان، هرمزگان، یزد، بوشهر، کوهگیلویه و بویراحمد و خوزیستان ایسه فعالیت گؤستره‌جک یگانه ایالتلردیر.
تهران ایالتی‌نین شهرسالما ایشلری اوزره معاونی پایتاختین باغلانما سببینی "هاوا دورومو تخمینلرینه اساساً سویوق هاوانین داوام ائتمه‌سی" ایله علاقه‌‌‌لندیریب و بیلدیریب کی، تهران ایالتی‌نین انرژی توکتیمی‌نین ایدارئدیلمه‌سی اوزره ایشچی قروپونون قرارینا اساساً، ۷ اسفند چارشنبه آخشامی بوتون دؤولت ایداره‌لری، ائیتیم اوجاقلاری، اوخوللار و بیلیم یوردلاری باغلی قالاجاق.
میرجفرایان علاوه ائدیب کی، خیدمت و تعجیلی یاردیم قوروملاری ایشله‌مه‌یه داوام ائده‌جک، بانکلار ایسه ایالتین موختلیف شهرلرینده سئچیلمیش شؤبه‌لری واسطه‌‌‌سیله فعالیت گؤستره‌جک.
سون آیلاردا ایراندا اوخوللار و دؤولت ایداره‌لری‌نین باغلانماسی بیر نئچه دفعه تکرارلانیب. دؤولت یئتکیلیلری بونون سببینی "انرژی بالانسسیزلیغی‌نین ایداره اولونماسی" کیمی گؤستریبلر. "بالانسسیزلیق" ایسلام جمهوریتی یئتکیلیلری‌نین ایراندا الکتریک و گاز قیتلیغی بؤحرانینی تصویر ائتمک اوچون ایستیفاده ائتدیگی بیر قاورامدیر.
ایران دونیانین ان بؤیوک فوسیل یاناجاق رزرولریندن بیرینه صاحب اولدوغو حالدا، ایسلام جمهورییتی وطنداشلاری‌نین الکتریک و گاز احتیاجلارینی تعمین ائتمکده چتینلیک چکیر.
بوندان علاوه، ایران حؤکومتی سون اونیللیکلر ایچینده نووه پروقرامینا میلیاردلارلا دوللار خرجله‌ییب و دفعه‌‌لرله بو پروقرامین اساس مقصدلریندن بیری‌نین نووه الکتریک سانتراللاریندا انرژی اورتیمی اولدوغونو ادعا ائدیب.
Iranwire
