ایران ایسلام جمهورییتی‌نین جمهورباشقانی مسعود پزشکیان، انرژی ده داخیل اولماقلا چئشیدلی ساحه‌‌‌لرده مؤوجود اولان چاتیشمازلیقلارا توخوناراق دئدی: "منی کیم حساب ائدیرسینیز؟ ائله بیلیرسینیز کی، سحرلی قوتوم وار؟ خئیر، من آلتی آی اؤنجه مجلیسده گزیردیم، ایندی ایسه جمهورباشقانی اولموشام."
پزشکیان ۲ اسفند گونو تهران ایالتی‌نین باتی بؤلگه‌سی مودیرلری ایله گؤروشونده بیلدیردی: "هارا باخیریقسا، بالانسسیزلیق وار. سو، الکتریک، گاز، پول، تورپاق، اوخول، خسته‌خانا یاتاقلاری. ایستکلر سونسوزدور، ایمکانلاریمیز ایسه محدوددور."
جمهورباشقانی آدایی اولدوغو واخت "تحریملرین لغوی" شوعاری ایله چیخیش ائدن پزشکیان، بیر حل یولو تقدیم سونمادان آرتیردی: "اگر اؤز دوشونجه و اینانجیمیزی محدودلاشدیرماساق، ترامپ بیزی تحریم آلتینا سالا بیلمز. اؤزوموز اؤزوموزو محدودلاشدیریریق."
او، اؤلکه‌ده سو، الکتریک و گاز کیمی چئشیدلی ساحه‌‌‌لرده مؤوجود اولان بالانسسیزلیقلارین سببینی بئله ایضاح ائتدی: "مؤوجود بالانسسیزلیقلارین سببی، وارلیقلارلا ایستکلر آراسینداکی اویغونسوزلوقدور."
او، آیریجا قئید ائتدی: "بو بالانسسیزلیقلارین مؤوجود اولماسی‌نین سببی، بو اؤنملی ایلکه‌یه دقت یئتیریلمه‌مه‌سیدیر. یا بونو باشا دوشمه‌میشیک، یا دا بیله‌رکدن بوراخمیشیق. نییه بو اؤنملی ایداره‌ائتمه ایلکه‌سینی آنلایا بیلمه‌دیگیمیزی بیلمیرم."
ایران ایسلام جمهورییتی اوزون مدتدیر کی، اؤلکه‌نین ایداره ائدیلمه‌سینده انرژی چاتیشمازلیغی ایله اوزلشیر و بو پروبلئمی ساده‌جه "انرژی بالانسسیزلیغی" آدلاندیرماغا اوستونلوک وئریر.
ایراندا انرژی بؤحرانی‌نین کؤکلری ایللر اؤنجه‌یه گئدیب چیخیر و اؤزللیکله ۱۳۹۰-جی ایللرین ایکینجی یاریسیندان اعتباراً اورتایا چیخیب. ایندی ایسه وطنداشلار بو بؤحرانین بوتون بویوتلارینی گونده‌لیک حیاتلاریندا حیس ائدیرلر.
Iranwire
